Галын дохиолол дуугарахад сандралгүй гарах, утаатай орчинд аюулгүй шилжих, усны ослын үед өөрийгөө эрсдэлд оруулахгүйгээр тусламж дуудах, газар хөдлөлтийн үед өөрийгөө хамгаалах, анхны тусламжийн үндсэн үйлдлүүдийг сургалтын хэрэгсэл дээр дадлагажих зэрэг нь зөвхөн онолын мэдлэг биш, амь нас хамгаалах чадвар юм.
Энэ зорилгын хүрээнд Хүлэг Интернэшнл сургуулийн эцэг эхчүүдийн “Сайн дурын 5 цаг” хөтөлбөрийн хүрээнд 2А ангийн эцэг эхчүүдийн санаачилга, дэмжлэгтэйгээр Онцгой байдлын албатай хамтран 1–12 дугаар ангийн сурагчдын дунд Гамшгаас хамгаалах дадлага сургалт зохион байгууллаа.
Сурагчид галын дохиолол, хоргүй хиймэл утаа ашигласан орчинд аюулгүй нүүлгэн шилжих дадлага хийж, гал унтраах автомашинтай танилцан, хяналттай орчинд асаасан галыг гал унтраагуураар унтраах үйл ажиллагааг ажиглаж, бодит туршлага хуримтлууллаа.Боловсрол гэдэг зөвхөн мэдлэг олгох биш, амьдралын бодит нөхцөлд тэр мэдлэгээ ашиглаж чаддаг хүнийг төлөвшүүлэх явдал юм.
Хүүхэд бүрийн аюулгүй байдлын боловсролд хувь нэмэр оруулсан 2A ангийн эцэг эхчүүд болон Онцгой байдлын албаны хамт олонд талархал илэрхийлье!
